رجع المطر // شعر محمد محمد الطنطاوي

رجع المطر
حباته بتطبطب علي جدار الزمن
بتصحصح الحزن اللي سافر من بعيد
بين المناظر والصور
رجع المطر
وف قلبه ألبوم ذكريات
بتشدني وبتهدني تراتيل وجع
ودموع بعاد
ومابين عنيكي ومهجتي
ذكري ومعاد
رجع المطر
لما السحابة اتبسمت
عزفت علي ضلوع الوتر
مليون قصيدة بتتولد
وبتتغسل كل الوشوش
متبقعة بلون الشجن
والقلب مرسوم ضحكته
تباريح ألم
لما اندفن وش الوطن والذكريات
تحت المطر
وأنا والمطر
حاضنين بقايا ضلنا تحت الشجر
مع تحياتي
محمد محمد الطنطاوي
2/12/2016