[ مش هقدر أكتبلك قصيدة [ بقلم : محمد محمد الطنطاوي

[مش هقدر أكتبلك قصيدة] 
الشوق شفايفه بتبتسم
لما ف عنيكي بتترسم لحظة رجوع
حضناني فيكي من زمان 
ضمة حنان ولهيب دموع
لا كنت عارف سكتي
ولا عشتها أيام سعيده
لا بحت ليكي بمحنتي
رغم الجراح ف محبتي
وبشوف عنيكي ف دنيتي
أحزان تروح وبتتولد
أحزان جديدة
وقسوتك
وخداني ليه من ضحكتي
وعيونك الشبعانه موت
سرقاني ليه من حضنها
بتاخدني من لحظة سكوت
وبتتزرع
جواكي أحلامي الشريدة
بقيت عشانك زي طير من غير سما
مسجونة جوايا السنين
وبشوف عنيكي ليلة حلوة منغمة
مجروحة بالشوق والحنين
وبترسمك جوايا أشواقي الوليدة
عشان بضمك جوا روحي وبحضنك
وعشان مافيش ولا أي شعر يفسرك
وعجزت أوصفلك مشاعري ولهفتي بحنين شغوف
وعشان لا يمكن توصفك كل الحروف
مش هقدر أكتبلك قصيدة
مع تحياتي
محمد محمد الطنطاوي
6/12/2016