ادي نصيبك يا قلبي احمد صبري

ادي نصيبك يا قلبي
احمد صبري


ادي نصيبك يا قلبي
احمد صبري
-
وادي يا قلبي اللي عشانه
كنت تملي على إستعداد
تتحمل وجعه واْحزانه
تتعب تشقى تمشي بلاد
مع اْول موجة بيتغير
وبيقدر يقسى وبيبيع
النار ملمومة وبتمطر
ومشاعرك عمالة تضيع
-
ادي يا قلبي اللي إتمنيته
سميته روحي وحياتي
لما إحتاجته لما ناديته
لما طلبته يداوي اْهاتي
إستخسر فيك الحنية
وكاْنك ولا كنت حبيبه
الدنيا يا قلبي مراكبية
والكل بيهرب من عيبه
-
ادي ياقلبي اللي بيتشطر
وبيقدر يقسى وينساك
هو ينام وعيونك تسهر
ويسيبك تعبان بهواك
معقولة حتقدر تتحمل
هجرانه وانت بتندهله
وإزاي بعذابك هتكمل
وهتفضل ديما محتاجله
-
ادي نصيبك ياقلبي
راح تعمل إيه وياه
الصبر منك يا ربي
على اْوجاع الحياه
اللي بتحبه وشاريه
تبقي مش فارق معاه
واللي انت غالي عليه
عيونك مش شيفاه