أرض الشام والجرح الدامي // بقلم ادريس جبيلو

الجرح الدامي

يلا صادفك كلامي
حطه ف ميزانك حروف
لاتتبع خيال اوهامي
وتندم على ماتشوف
وزن ضروف ايامي
واحكم عليا بالمعروف
مقامك عندي سامي
انت المغزل وانا الصوف
سعادتك ماشي ف لجامي
ولا ف مراية المكفوف
انا الجرح الدامي
وانت الضماد المعروف
خليك معايا رامي
والرمى مايعلم الخوف
بحري بمواجك حامي
يهدد سفينة المكشوف
بعجاجة ريحها شامي
يخلي رايسها متلوف
تهوى ف بحر اسقامي
وتطلع ع الوجه شقوف

بقلم ادريس جبيلو

@@@@@@@@@@@@@

ارض الشام

الحلال حرام
والحرام حلال
ياولد آدام
اش هاد الفال
اشعلت الشام
وفيقت الاهوال
ارعبت الاحلام
وحصدت الآمال
انا مضيوم
كتابي مجحوم
گلبي مهموم
ك يدگ الدوم
صوتي مكتوم
طريقي ملغوم
امري محسوم
وفردي محكوم
لبني حرام
والهديم حلال
ياولد آدام
علاش بالهلال
قجيتي الالهام
وكرمت الركال
لحت السلهام
وهرست القلال
نفسي يالمجدومة
فين داك الحومة
واش صبحت كومة
فين كنتو انتوما
صليو ع المرحومة
وكتبو بالقلومة
ع القبور المسمومة
الله يخلف ع الدومة
الحلال حرام
والحرام حلال
لبني حرام
والهديم حلال
علاش ياولد آدام
قتلت ويتمت العيال
فين السلام
اللي بنات الاجيال
وارض الشام
زينت الخيال

بقلم ادريس جبيلو